21/09/15

Su Financial Times faeddat de SARDEX, su dinari virtuale nàschidu in Sardigna

Oh oh. Su dinari virtuale "Sardex" est in bella mustra in sa prima pàgina de su Financial Times (sa Bìblia de sa finàntzia mundiale, su giornale lèghidu dae banchieris e òmines de afàrios de totu su mundu), in un'artìculu iscritu dae Edward Posnet chi podides lèghere (bortadu in italianu) in custu link.
Ma  ite est custu Sardex? Est unu "dinari cumplementare" chi permitit a prus de 2.000 impresas de generare economia, benèssere e coesione sotziale.
Carlo Mancosu (unu de sos ideadores) pro ispiegare comente funtzionat Sardex  faeddat de sos nuraghes: "Dae ogni nuraghe nde bides un'àteru. Como immàgina·ti unu sistema de comunicatzione fatu de lughes e de fogos. Deo penso chi in cussu tempus s'agataiat unu pòpulu in rete. Sos nuraghes fiant una rete". E una rete est finas custa generada dae su dinari virtuale, chi movet dae su cuntzetu antigu de dèpidu comente òbrigu sotziale: chie leat devet torrare, pro pagare su dèpidu chi tenet.
In paràulas pòberas-pòberas si diat pòdere nàrrere chi est unu tipu de economia "a cuncàmbiu", e chi su motore de totu est sa gente, sas relatziones umanas, s'impignu de ognunu pro istare bene totus. E in custos tempos de dificultade econòmica manna podet èssere sa solutzione  prus adata a totu cussas impresas chi s'agatant in dificultade cun sa licuididade.
Nant·chi sa giaja de Gabriele Lìttera (presidente de Sardex) costumaiat a nàrrere "Proibidu murrungiai", e paret chi siat custa sa filosofia de sos fundadores de s'impresa: imbetzes de si lamentare pro sas dificultades, ant provadu a traballare pro mudare sas cosas.
Nos paret a nois puru una bona filosofia de vida, custa.

Nessun commento:

Posta un commento

Nota. Solo i membri di questo blog possono postare un commento.