21/07/14

Interventu de prof. Contini in s'atopu fatu chenàbura passada in Santu Lussurzu

Prof. Michel Contini
Chenàbura passada in Santu Lussurzu s'est fata sa presentada de su libru "Unità e variabilità fonetiche delle parlate sarde meridionali", un'istùdiu interessante meda fatu dae Maria G. Cossu subra de sas faeddadas meridionales de Sardigna.
S'atopu, coordinadu dae Anthony Muroni (diretore de "L'Unione Sarda") at bidu sa presèntzia de gente meda e de reladores de importu: Michel Contini (professore emèritu in s'Universidade de Grenoble), Nicolò Migheli (sotziòlogu), Giacomo Mameli (giornalista e iscritore).
Professor Contini, in manera particulare, at fatu un'interventu craru e argumentadu in contu de sa Limba Sarda Comuna, narende chi sa LSC no est contra a sos dialetos ma lis est cumplementare. At sutalineadu chi sa limba sarda est una ebbia, chi sa variabilidade interna est normale in totu sas limbas de su mundu e chi sa partzidura intre "Logudoresu" e  "Campidanesu" benit dae una visione betza de su sardu.
At postu in evidèntzia chi sa LSC est nàschida pro more de su traballu de una Cummissione de espertos e de sa voluntade de sa Giunta Soru, e chi no est "imbentada" ca b'at biddas chi faeddant una  variedade de sardu assimigiante a su 90% a sa norma seberada.
In finis, Contini at ispiegadu chi est normale chi una norma iscrita bèngiat megiorada in su tempus. At contadu chi s'Académie française tenet in intentu de megiorare finas sa limba frantzesa (chi puru tenet prus de 400 annos) ca s'est abbigiada chi b'at galu cosas chi cherent regulamentadas.
Un'atopu interessante a beru, cun paritzos argumentos de riflessione.



Nessun commento:

Posta un commento

Nota. Solo i membri di questo blog possono postare un commento.