12/03/14

Custa est s'ora

Su 25 de custu mese, in Casteddu, est cunvocada sa Cunferèntzia de Servìtzios pro dare a sa sotziedade Exergia Toscana s.r.l. sos permissos de chircare s'energia geo-tèrmica in su Montiferru.
Comente ischimus, custas trivellatziones sunt perigulosas meda ca podent incuinare sos benales. Essende chi su Montiferru est unu de sos territòrios sardos prus  ricos de abba (dat abba a mesa Sardigna, e in manera particulare a sa Pianalza e a su territòriu de Aristanis) si podet cumprèndere su dannu mannu chi bi podet capitare.
Sos Comunes interessados sunt Cùglieri, Frussio, Magumadas, Sàgama, Santu Lussurzu, Iscanu, Sèneghe, Sinnarìolo, Tinnura, Tresnuraghes.
Ogni Comune devet mandare unu rapresentante pro nàrrere si est de acordu o nono. Si su Comune non s'oponet, sa sotziedade podet trivellare sena problemas.
Bidu chi sa Sardigna s'est trasformende in un'Eldorado energèticu e totus current a si nd'istratzare unu cantu (su prus sena rispetare ambiente, risorsas idrogeològicas, istòria e cultura) nos paret importante chi sos territòrios si mobilitent, e in primis sos Sìndigos e sas Amministratziones comunales.
Cuglieridanos, Frussiesos, Magumadesos, Sagamesos, Lussurzesos, Iscanesos, Seneghesos, Sinnariolesos, Tinnuresos, Tresnuraghesos: s'ora de difèndere su territòriu nostru est custa.
Pro nd'ischire de prus leghe inoghe e inoghe.





Nessun commento:

Posta un commento

Nota. Solo i membri di questo blog possono postare un commento.